Gujarat News પંચમહાલ જિલ્લા સંકલન સમિતિ ભાગ ૧ અને ૨ની બેઠક યોજાઈ

રસ્તા,પાણી અને વીજળીના પ્રશ્નો સત્વરે ઉકેલવા અધ્યક્ષસ્થાનેથી સૂચનાઓ આપવામાં આવી

ગોધરા કલેક્ટર કચેરી,સભાખંડ ખાતે પંચમહાલ જિલ્લા સંકલન સમિતિ ભાગ ૧ અને ૨ની બેઠક રાજ્યના શિક્ષણમંત્રી અને પંચમહાલ પ્રભારી મંત્રીશ્રી કુબેરભાઈ ડીંડોરની વિશેષ ઉપસ્થિતિમાં તથા જિલ્લા કલેકટરશ્રી આશિષ કુમારના

અધ્યક્ષસ્થાને યોજાઈ હતી.

આ બેઠકમાં જિલ્લાના પ્રભારી મંત્રીશ્રી કુબેરભાઈ ડીંડોરએ પંચમહાલ જિલ્લામાં ચાલી રહેલા વિકાસ કામોની સાંપ્રત સ્થિતિનો તાગ મેળવી,છેવાડાના વ્યક્તિઓને સરકારી લાભો મળી રહે તથા પ્રજાના પ્રશ્નોને તાકીદે ઉકેલવા તથા વિવિધ વિકાસ કામો સત્વરે પૂર્ણ કરવાની જિલ્લાના અમલીકરણ અધિકારીઓને તાકીદ કરી હતી.

તેમણે સરકારશ્રીની વિવિધ યોજનાઓના લાભોની પેન્ડિંગ અરજીઓનો નિકાલ કરવો,જિલ્લામાં ખુલ્લા બોર અને કુવાઓ ઢાંકવા,પ્રધાનમંત્રી આવાસ યોજના,જાતિના દાખલા, રસ્તાઓનું સમારકામ, ભારત માલા પ્રોજેક્ટ,પાવાગઢમાં પાણીની સમસ્યાનું નિરાકરણ,શાળાઓના ઓરડાઓ, નમો લક્ષ્મી અને નમો સરસ્વતી યોજનાઓનો પ્રચાર પ્રસાર, શંકાસ્પદ ચાંદીપુર વાઇરસ બાબતે જાગૃતિ અભિયાન,વીજળી સહિતના મુદ્દાઓ અને તેના નિરાકરણ બાબતે સબંધિત અધિકારીશ્રીઓને તાકીદ કરી હતી. બેઠકમાં જિલ્લા કલેકટરશ્રીએ કચેરી તપાસ-નિરીક્ષણ કરીને ક્ષતિ હોય તો સરકારશ્રીના ધ્યાને લાવવા તથા કચેરી કાર્યપદ્ધતિ મુજબ અધિકારીશ્રીઓને કામ કરવાની સૂચનાઓ આપી હતી.

આ બેઠકમાં ગત તથા અગાઉની મીટીંગમાં અધ્યક્ષસ્થાનેથી ચર્ચાયેલ કામગીરીની પ્રગતિ,એકશન ટેકન રીપોર્ટ,જે તે કચેરીને સીધી મળેલ પડતર અરજીઓના નિકાલ, જે તે કચેરી હસ્તકની વિવિધ યોજનાઓ તથા તેના લક્ષ્યાંકો- સિધ્ધિઓ, લોકાભિમુખ વહીવટ, નાગરિક અધિકાર પત્રની અરજીઓ, આ ઉપરાંત જિલ્લાના તાકિદના પ્રશ્નો બાબતે ચર્ચા કરાઈ હતી.બેઠકમાં ધારાસભ્યશ્રીઓ દ્વારા રજૂઆત કરાયેલા પ્રશ્નોનું ઝડપી નિરાકરણ લાવવા સંબંધિત અધિકારીશ્રીઓને જિલ્લા કલેકટરશ્રીએ સૂચનાઓ આપી હતી.

આ બેઠકમાં પંચમહાલ જિલ્લા પંચાયતના પ્રમુખ શ્રીમતી રેણુકાબેન ડાયરા,સાંસદશ્રી ડૉ.જશવંતસિંહ પરમાર,શ્રી રાજપાલસિંહ જાદવ,સર્વ ધારાસભ્યશ્રીઓ શ્રી જયદ્રથસિંહજી પરમાર,શ્રીમતી નિમીષાબેન સુથાર,શ્રી ફતેહસિંહ ચૌહાણ,શ્રી સી.કે.રાઉલજી,ડી.ડી.ઓશ્રી ડી.કે.બારીઆ સહિત જિલ્લાના વિવિધ અમલીકરણ અધિકારીશ્રીઓ ઉપસ્થિત રહ્યા હતા.