કોડિનાર ટોઇલેટ બ્લોકના કામમાં તપાસની માંગ..

મોટી ફાફણીમાં ગ્રામ પંચાયતના ટોઈલેટ બ્લોકના કામમાં ગેરરીતિના આક્ષેપો, તપાસની માંગ

કોડીનાર તાલુકાના મોટી ફાફણી ગામે 15 માં નાણાપંચની ગ્રાન્ટમાંથી થયેલી ટોઈલેટ બ્લોકની કામગીરી અંગે ગેરરીતિના આક્ષેપો ઉઠ્યા છે. ગામના નવાપરા વિસ્તારમાં કોમ્યુનિટી હોલની બાજુમાં બનાવવામાં આવેલા ટોઈલેટ બ્લોકના કામ અંગે સ્થળ તપાસ કરી જવાબદારો સામે નિયમ મુજબ કાર્યવાહી કરવાની માંગ કરવામાં આવી છે.

મળતી ફરિયાદ મુજબ, ટોઈલેટ બ્લોકની કામગીરીમાં કેટલાક જરૂરી કામો નિયમ મુજબ કરવામાં આવ્યા ન હોવાના આક્ષેપો કરવામાં આવ્યા છે. ફરિયાદમાં જણાવ્યા પ્રમાણે વેન્ટિલેશન તથા દરવાજાના ઉપરના ભાગે લેન્ટર ભરવામાં આવ્યું નથી. તેમજ બારી-દરવાજા પણ ગુણવત્તા અને નિયમ મુજબ ફિટ કરવામાં આવ્યા ન હોવાના આક્ષેપો છે.

આ ઉપરાંત ટોઈલેટ બ્લોકની બહારના ભાગે જરૂરી સોક પિટ/સોક ખાડો બનાવવામાં આવ્યો ન હોવાનો પણ ફરિયાદમાં ઉલ્લેખ કરવામાં આવ્યો છે.

ફરિયાદમાં વધુમાં આક્ષેપ કરવામાં આવ્યો છે કે ઉપરોક્ત કામગીરી સંપૂર્ણપણે કરવામાં આવી ન હોવા છતાં કામનું ચુકવણું કરવામાં આવ્યું હોવાની શંકા છે. આ બાબતે સંબંધિત તાલુકા પંચાયતના ઇજનેર દ્વારા કામગીરીની ચકાસણી કેવી રીતે કરવામાં આવી અને ચુકવણું કયા આધાર પર કરવામાં આવ્યું તે અંગે પણ તપાસ કરવાની માંગ કરવામાં આવી છે.

ગામના ઉપસરપંચ માનસિંહભાઈ વાળા તેમજ પૂર્વ તાલુકા પંચાયત સભ્ય દ્વારા પણ સ્થળ પરની કામગીરી અંગે તપાસની જરૂરિયાત દર્શાવવામાં આવી હોવાનું ફરિયાદમાં જણાવાયું છે.

ફરિયાદી દ્વારા સંબંધિત સત્તાધિકારી સમક્ષ સમગ્ર કામની ટેકનિકલ તપાસ, સ્થળ ચકાસણી, માપપોથી (MB), બિલ-વાઉચર તથા ચુકવણાના રેકોર્ડની તપાસ કરી હકીકત બહાર લાવવા અને જો ગેરરીતિ સાબિત થાય તો જવાબદાર વ્યક્તિઓ સામે નિયમ મુજબ કાર્યવાહી કરવાની માંગ કરવામાં આવી છે.

હવે તંત્ર દ્વારા સ્થળ તપાસ અને ઉપલબ્ધ સરકારી રેકોર્ડની ચકાસણી બાદ હકીકત શું છે તે સ્પષ્ટ થશે.