Chhattisgarh News 3 जुलाई 2026 को रिलीज होने वाली छत्तीसगढ़ी भाषा की फिल्म पप्पू के शादी में भारी टेंशन।

ब्यूरोचीफ राकेश कुमार साहू जांजगीर-चांपा छत्तीसगढ़

महिमा देवांगन ने छत्तीसगढ़ी भाषा में अपना विचार को प्रेस वालों के पास साझा किया है। वह इस प्रकार से है।

नमस्कार, जय जोहार, जय छत्तीसगढ़ संगवारी हो 🙏

मोर नाव महिमा देवांगन हवय, अउ मैं छत्तीसगढ़ के एक कलाकार हंव। मोर जनम कोरबा जिला मा होय हे मोर परवरिश घलो कोरबा म ही होय हे। मोर परिवार म मोर मम्मी-पापा, अउ मोर दू भाई मन रहिथें। मोर पढ़ाई के बात करंव त, मैं आठवीं कक्षा तक (ज्ञान अंजली विद्या मंदिर कोरबा) मा पढ़े हंव। ओकर बाद बारहवीं तक के पढ़ाई मैं चांपा म मोर नानी गांव म रहिके पूरा करे हंव। उहा मैं अपन मामा मन के देखरेख म पढ़े हंव अउ सरकारी गर्ल्स स्कूल (शासकीय महारानी लक्ष्मीबाई कन्या उच्चतर माध्यमिक विद्यालय, चांपा) मा बारहवीं पास करे हंव। ओकर बाद मैं कोरबा वापस आके (शासकीय इंजीनियर विश्वेश्वरैया स्नातकोत्तर महाविद्यालय, कोरबा) कॉलेज ले अपन ग्रेजुएशन पूरा करे हंव। अउ आगे बढ़त हुए मैं LLB के पढ़ाई (ज्योति भूषण प्रताप सिंह लॉ कॉलेज, कोरबा) मा पूरा करे हंव। अब मैं अपन एक्टिंग के सफर के बारे म बताथंव। कॉलेज के समय मैं (NSS) म जुड़े रहेंव। जब हमन कैंप गे रहेंन, जिहां हमन छत्तीसगढ़ के संस्कृति ला दिखाय के काम करत रहेंन—जइसे डांस अउ गीत।

ओही दौरान कुछ सीनियर मन मोला देखिन अउ मोला शूटिंग म काम करे के मौका देइन। सुरू म मैं थोड़ा हिचकिचाएंव, काबर घर के परिस्थिति साधारण (मिडिल क्लास) रहिस। मोर मम्मी दूसर के दुकान म काम करत रहिन अउ मोर पापा प्लांट म काम करत रहिन, जऊन बाद म बंद होगे। अभी हमन छोटे से होटल चलाथन, जऊन तहसील ऑफिस के पास म हवय। जब शूटिंग के मौका मिलिस, त मैं अपन मम्मी-पापा ले पूछेंव। सुरू म थोड़ा संकोच रहिस, फेर मैं अपन हिम्मत ले एक मौका लेव के सोचेंव। पहिली बेर जब मैं शूटिंग म गेंव, त मोला सिरिफ बैकग्राउंड रोल मिलना रहिस। फेर अचानक परिस्थिति बदलिस अउ मोला हीरोइन के रोल के मौका मिलिस। शुरू म डर लगिस, फेर मैं हिम्मत करके वो मौका ला स्वीकार करेंव। मोर पहिली एल्बम (छत्तीसगढ़ी कर्मा सॉन्ग) रहिस, जऊन ला लोगन मन बहुत पसंद करिन। ओही ले मोर एक्टिंग के सफर सुरू होइस, अउ आज मैं आगे बढ़े के कोशिश करत हंव। जब मोर गाना आईस मम्मी-पापा मन ओ एल्बम ल देखिन, त ओ मन बहुत ज़्यादा खुश होइन। ओ मन के खुशी देखके मोला घलो बहुत अच्छा लगिस। ओकर बाद धीरे-धीरे मोर पास अउ छोटे-छोटे एल्बम के ऑफर आना शुरू होइस। मैं एक-दू एल्बम करंव, तेखर बाद मोला The ADM production से आनंद सर संग काम करे के मौका मिलिस। हमन मिलके “ए राजा मोर शिकारी बैरी” गाना शूट करेन जऊन बहुत सुन्दर रहिस। ये गाना मोर दिल के बहुत करीब हवय—जब मैं परेशान रहिथंव, त ये गाना सुनके मोला शांति मिलथे। ओही गाना ले लोगन मन मोला पहिचानना सुरू करिन, खास करके आनंद सर के फॉलोअर्स अउ टीम म। ओकर बाद मोला आनंद सर ले सेकंड प्रोजेक्ट मिलिस, जऊन पकलू85 सर संग रहिस। “ये ज़िंदगी तो नाम होगे” ये गाना ला भी लोग मन बहुत पसंद करीन। तभी बीच म लॉकडाउन आ गे। लॉकडाउन के समय आनंद सर मोला पूछिन कि “एक्टिंग करहू?” सुरू म मैं डरे रहंव, काबर मोला लगत रहिस कि मैं सही से नहीं कर पावंव। फेर सर मोला छोट-छोट स्क्रिप्ट भेजिन अउ मैं घर म वीडियो बनाके भेजेंव। जब सर ला मोर वीडियो पसंद आय, त हमन कोरबा म ही छोट-छोट शूटिंग करके “लॉकडाउन में बिहाव3” नाम के वीडियो बनाइन। ये वीडियो ला लोगन मन बहुत पसंद करिन। ओकर बाद हमन कुछ कॉमेडी वीडियो घलो बनायेन ओकर बाद 2023 म मोला “श्याम म्यूजिक प्रोडक्शन” ले कॉल आइस कि एक गाना म काम करना हे। मैं गाना मुखड़ा ला सुन के बिना पूरा सुने ही हाँ बोल दिए, कबार की गाना बहुत अच्छा रिहीस ओ गाना “दर्दे दिल के दर्द” रहिस, जऊन बहुत जादा वायरल होइस। लोगन मन मोर अउ झरनेश सर के जोड़ी ला काफी पसंद करीन ओ गाना म रील बनाइन, डांस स्टेप कॉपी करिन—ये सब देखके मोला बहुत खुशी मिलिस।

ओकर बाद मैं झरनेश सर संग अउ घलो कई गाना करंव—जइसे “मोंगरा मोंगरा” अउ घलो कई प्रोजेक्ट, जऊन धीरे-धीरे वायरल होइस। ओकर बाद मैं झरनेश सर संग कई कॉमेडी वीडियो बनायेन, जऊन ला यूट्यूब म डालिन। ओ वीडियो मन ला घलो लोगन मन पसंद करिन, अउ धीरे-धीरे मोर पहचान बढ़त गीस। ओकर बाद मोला एक सैड सॉन्ग म काम करे के मौका मिलिस। फेर ओ समय मोर सबसे बड़े कमजोरी रहिस—रोना अउ इमोशन दिखाना। मैं रो नहीं पावत रहेंव, जऊन ले मैं अपन दर्द अउ भावना सही ढंग ले दर्शा नहीं पावत रहेंव। झरनेश सर मोला बहुत सपोर्ट करिन अउ सिखाइन, फेर जब मैं अपन वीडियो देखंव, त मोला अपन ऊपर भरोसा कम हो जावत रहिस। मोला लगिस कि अगर मैं सही से इमोशन नहीं दिखा पावत हंव, त मैं एक्टिंग कैसे करहूं। ओही समय मोला मोहन चौहान सर के द्वारा पता चलिस कि रायपुर म एक्टिंग वर्कशॉप होथे। मैं तुरंत हाँ कहके 7 दिन के वर्कशॉप ज्वाइन करेव जो Indravati Entertainment के तरफ़ से होत रीहीस। ओ वर्कशॉप मोर जिंदगी के टर्निंग पॉइंट बनिस। उहाँ मैं सीखेंव कि एक्टिंग सिरिफ डायलॉग बोलना नहीं होथे, बल्की भावना ला जीना होथे।
मैं जानेंव कि हर प्लेटफॉर्म के एक्टिंग अलग होथे—एल्बम, रील, मूवी, कॉमेडी—सबके अपन तरीका होथे। स्क्रिप्ट कैसे पढ़े, कैरेक्टर म कैसे घुसे, इमोशन कैसे दिखाए—ये सब मोला इंदिरावती इंटरटेनमेंट के माध्यम ले आकाश सोनी सर के द्वारा सीखे बा मिलिस। ओकर बाद मोर अंदर आत्मविश्वास आइस, अउ मैं बेहतर एक्टिंग करना सुरू करेंव। फिर मोला “मोर जानबर ” गाना के लिए रायपुर ले कॉल आइस। मैं ओ गाना करे बर गेंव, अउ ओही दौरान मोर मुलाकात “पप्पू के शादी में भारी टेंशन” फिल्म के डायरेक्टर संग होइस। ओ समय सर मोला मूवी के बारे म बताइन, फेर मैं अपन काम म इतका बिजी हो गेंव कि मैं ओ मन के कॉन्टैक्ट तक ले नहीं पायेव। कुछ महीना बाद जब ओही फिल्म के ऑडिशन चलत रहिस, त मैं जाके ऑडिशन दिये—अउ मैं सेलेक्ट हो गेंव। ओ दिन मोर जिंदगी के सबसे खुशी के दिन मन म ले एक रहिस। मोर परिवार घलो बहुत खुश होइस कि मैं अब फिल्म म काम करहूं। सबसे खास बात ये रहिस कि जऊन डायरेक्टर संग मैं पहले मिल चुके रहेंव, ओही सर मोला मौका दिन अउ जब मोला ये पता चलिस कि फिल्म के हीरो झरनेश सर हवंय, त मोर खुशी अउ बढ़ गीस। काबर मैं ओ मन ला पहले ले जानत रहेंव, त काम करना अउ आसान अउ मजेदार हो गीस। आज मैं यही चाहत हंव कि मैं आगे घलो मेहनत करत रहंव, अउ लोगन मन के मया-दुलार अउ आशीर्वाद मोला मिलत रहय। आखिरी म, मैं आप मन सबले निवेदन करथंव कि 3 जुलाई के रिलीज होवत हे हमर फिल्म “पप्पू के शादी में भारी टेंशन” ला जरूर देखव अउ अपन मया-दुलार देवव।🙏 मोर सपना हवय कि मैं आगे जाके एक सफल कलाकार बनंव अउ अपन छत्तीसगढ़ के नाम रोशन करंव।

धन्यवाद 🙏 एकर जानकारी हमर रिपोर्टर राकेश कुमार साहू कोरबा गए रहीम है त सुघ्घर गोठ निकलिश त महिमा हर बताइश ।