ગુજરાત. દારૂબંધી .. કે મિલીભગત. કોની રહેમ..

જુનાગઢમાં નકલી વિદેશી દારૂનું કારખાનું ઝડપાયું: પોલીસે બે સગા ભાઈઓને રંગે હાથ ઝડપી લીધા, ૧૪ લાખનો મુદ્દામાલ કબ્જે

જુનાગઢ, ૬ જાન્યુઆરી ૨૦૨૬: જુનાગઢના ધરાનગર વિસ્તારમાંથી નકલી વિદેશી દારૂ બનાવવાનું ગુપ્ત કારખાનું ઝડપાયુ .બાતમીના આધારે પોલીસે દરોડા પાડીને બે સગા ભાઈઓને રંગે હાથ ઝડપી લીધા છે. આ ઘટનામાં સ્થળ પરથી ૧,૪૦૦થી વધુ નકલી દારૂની બોટલો, પેકિંગ મશીન અને અન્ય સાધનો મળી આવ્યા છે, જેની કુલ કિંમત આશરે ૧૪ લાખ રૂપિયા આંકવામાં આવી છે.

પોલીસ સૂત્રો અનુસાર, આ બે ભાઈઓ તેમનાજ ઘરમાં કેમિકલ અને રંગોના મિશ્રણથી નકલી વિદેશી દારૂ તૈયાર કરી રહ્યા હતા. ગુપ્ત બાતમી મળતાં જ પોલીસ ટીમે તાત્કાલિક કાર્યવાહી કરી અને ઘટનાસ્થળે પહોંચીને આરોપીઓને પકડી લીધા. સ્થળ પરથી જપ્ત કરાયેલા મુદ્દામાલમાં નકલી દારૂની મોટી માત્રા ઉપરાંત પેકેજિંગ માટે વપરાતું મશીન અને અન્ય કેમિકલ સામગ્રીનો સમાવેશ છે. આ નકલી દારૂ વેચાણ માટે તૈયાર કરવામાં આવી રહ્યો હતો, જે આરોગ્ય માટે અત્યંત જોખમી હોઈ શકે છે.

આ ઘટના ગુજરાતમાં નકલી દારૂના વધતા જતા વેપારને ઉજાગર કરે છે, જ્યાં પ્રતિબંધ હોવા છતાં આવા ગુનેગારી કાર્યો ચાલુ છે. પોલીસે આરોપીઓ વિરુદ્ધ પ્રોહિબિશન એક્ટ અને અન્ય કલમો હેઠળ કેસ નોંધ્યો છે અને વધુ તપાસ હાથ ધરી છે. આરોપીઓની પૂછપરછમાંથી વધુ વિગતો મળવાની આશા છે, જેમાં તેમના વેપારના નેટવર્ક અને સપ્લાયર્સની માહિતી સામે આવી શકે છે.

જુનાગઢ પોલીસે જણાવ્યું કે, આવી બાતમીઓ પર તેઓ સતત કાર્યવાહી કરી રહ્યા છે અને નકલી દારૂના વેપારને અટકાવવા માટે વધુ સખત પગલાં લેવામાં આવશે. સ્થાનિક વિસ્તારમાં આવી ઘટનાઓથી લોકોમાં ચિંતા વ્યાપી છે, અને તેઓ પોલીસને વધુ સહયોગ આપવા તૈયાર છે.

(રિપોર્ટ: જાદવ એસ., આઇ સી. ન્યૂઝ)