Gujarat News : 2022 થી ચાલુ નીડર લડતને પહેલી મોટી સફળતા: માળિયા હાટીના પોલીસ સ્ટેશનમાં FIR નોંધાતા વિરોધીઓમાં ખળભળાટ

જૂનાગઢ જિલ્લામાં છેલ્લા ઘણા સમયથી ભ્રષ્ટાચાર, ગેરરીતિઓ અને સામાજિક અન્યાય સામે અવાજ ઉઠાવતા સામાજિક કાર્યકર અને પત્રકાર સુભાષભાઈ દેવાભાઈ જાદવ દ્વારા વર્ષ 2022થી શરૂ કરાયેલી નીડર અને અડગ લડતને આખરે પ્રથમ મોટી સફળતા મળી છે. માળિયા હાટીના પોલીસ સ્ટેશન ખાતે તેમની ફરિયાદના આધારે પ્રથમ FIR નોંધાતા સમગ્ર વિસ્તારમાં ચર્ચા જાગી છે.

સુભાષભાઈ જાદવ છેલ્લા ઘણા સમયથી ભ્રષ્ટાચારીઓ, માથાભારે તત્વો અને રાજકીય વગ ધરાવતા લોકો સામે કાયદાકીય અને સંવિધાનિક રીતે લડી રહ્યા છે. તેમની વધતી લોકપ્રિયતા અને સમાજમાં રહેલી સારી પ્રતિષ્ઠાને નુકસાન પહોંચાડવાના ઈરાદાથી કેટલાક તત્વો દ્વારા સતત બદનામી, ગાળો, ધમકીઓ અને માનસિક હેરાનગતિ કરવામાં આવતી હોવાના આક્ષેપો કરવામાં આવ્યા છે.

ફરિયાદ મુજબ આરોપીઓ દ્વારા ફરિયાદીને વારંવાર અપશબ્દો બોલવા, જાનથી મારી નાખવાની ધમકીઓ આપવા, “સંઘરી દેવાની” જેવી ગંભીર ધમકીઓ આપવા તેમજ સામાજિક અને માનસિક ત્રાસ પહોંચાડવાનો પ્રયાસ કરવામાં આવ્યો હતો. તેમ છતાં સુભાષભાઈ જાદવે કોઈપણ પ્રકારના દબાણ કે ભય સામે ઝૂક્યા વગર કાયદાકીય માર્ગ અપનાવી પોતાની લડત ચાલુ રાખી હતી.

મહત્વપૂર્ણ બાબત એ છે કે છેલ્લા બે વર્ષ દરમિયાન સુભાષભાઈ જાદવે માળિયા હાટીના પોલીસ સ્ટેશન, DYSP કચેરી તથા SP કચેરી જૂનાગઢમાં 40થી વધુ લેખિત અરજીઓ અને રજૂઆતો કરી હતી. લાંબી રાહ અને સતત અનુસરણ બાદ આખરે તેમની ફરિયાદમાં FIR નોંધાતા ન્યાયની આશા વધુ મજબૂત બની છે.

જાદવ સુભાષભાઈ  જણાવ્યું હતું કે:

મારી લડત કોઈ વ્યક્તિ વિરુદ્ધ નથી, પરંતુ અન્યાય અને ગેરકાયદેસર પ્રવૃત્તિઓ સામે છે. ધમકીઓ, દબાણ કે હેરાનગતિથી હું ડરવાનો નથી. આજે પહેલી FIR નોંધાઈ છે, આવનારા સમયમાં બાકી રહેલી અરજીઓમાં પણ કાયદેસરની કાર્યવાહી થાય તે માટે હું જરૂરી હોય તો હાઈકોર્ટ સુધી જવા તૈયાર છું.”

ફરિયાદમાં નામજોગ થયેલા આરોપીઓ એક જ પરિવારના સભ્યો હોવાનું સામે આવ્યું છે. ફરિયાદીનો આક્ષેપ છે કે રાજકીય પ્રભાવ અને અન્ય સમાજના કેટલાક લોકોના સમર્થનથી તેમને લાંબા સમયથી સામાજિક, માનસિક અને આર્થિક રીતે નુકસાન પહોંચાડવાનો પ્રયાસ કરવામાં આવી રહ્યો હતો.
સ્થાનિક સ્તરે આ FIRને એક મહત્વપૂર્ણ ઘટના તરીકે જોવામાં આવી રહી છે. અનેક લોકોનું માનવું છે કે સામાન્ય નાગરિક જો હિંમત, ધીરજ અને કાયદા પર વિશ્વાસ રાખે તો અંતે ન્યાય પ્રાપ્ત કરી શકે છે. સુભાષભાઈ જાદવની આ લડત એ સાબિત કરે છે કે સત્ય અને ન્યાય માટેની લડતમાં સંઘર્ષ લાંબો હોઈ શકે, પરંતુ જો લડત સંવિધાનિક અને કાયદેસર હોય તો પરિણામ જરૂર મળે છે.

“ન્યાય માટે લડવું પડે, ઝૂકવું નહીં” –  જાદવ સુભાષભાઈ

આ FIR માત્ર એક કેસ નથી, પરંતુ છેલ્લા ઘણા સમયથી ચાલી રહેલા સંઘર્ષ સામે કાયદાની પ્રથમ સત્તાવાર માન્યતા હોવાનું માનવામાં આવી રહ્યું છે. હવે સમગ્ર વિસ્તારની નજર આગળની પોલીસ તપાસ અને કાયદાકીય કાર્યવાહી પર કેન્દ્રિત થઈ છે.