Gujarat News : પાટણમાં વ્યાજખોરીનો કરૂણ અંત: ₹5 હજારની ઉછીની રકમ મામલે 35 વર્ષીય મહિલાનું સારવાર દરમિયાન મોત

रिपोर्टर मुकेश कुमार पाटन गुजरात

પાટણ: પાટણ શહેરમાં વ્યાજખોરી સાથે જોડાયેલી એક હૃદયવિદારક ઘટના સામે આવી છે. ઘરખર્ચ માટે માત્ર ₹5 હજાર વ્યાજે લીધેલા મામલે થયેલા વિવાદમાં 35 વર્ષીય મહિલાને જીવ ગુમાવવાનો વારો આવ્યો છે. પ્રાથમિક માહિતી મુજબ, પિન્કીબહેન પટણીએ વ્યાજખોર તરીકે ઓળખાતા બાબુભાઈ રાવળ પાસેથી ઘરખર્ચ માટે ₹5 હજાર ઉછીના લીધા હતા. રૂપિયા પરત કરવામાં વિલંબ થતાં શહેરના ટાંકવાડા વિસ્તારમાં બંને વચ્ચે ઉગ્ર બોલાચાલી થઈ હતી.

આક્ષેપ છે કે તકરાર દરમિયાન બાબુભાઈ રાવળે મહિલાના શરીર પર જવલનશીલ પદાર્થ છાંટી જીવલેણ હુમલો કર્યો હતો. ઘટનામાં મહિલા ગંભીર રીતે દાઝી જતાં તેમને તાત્કાલિક સારવાર માટે હોસ્પિટલમાં ખસેડવામાં આવ્યા હતા, જ્યાં સારવાર દરમિયાન તેમનું મોત નીપજ્યું. ઘટનામાં બાબુભાઈ રાવળ પણ દાઝ્યા હોવાનું જાણવા મળ્યું છે.

ઘટનાની જાણ થતાં પોલીસ સ્થળ પર પહોંચી હતી અને **ડાયિંગ ડિક્લેરેશન (D.D.)**ના આધારે ગુનો નોંધી સમગ્ર મામલે કાયદેસરની કાર્યવાહી હાથ ધરી છે. પોલીસ દ્વારા ઘટનાના તમામ પાસાઓની તપાસ ચાલી રહી છે.